Tbilisi City Guide

რეზო გაბრძიაძის მარიონეტების თეატრი - გამოჩენილი ქართველი მხატვრის, თეატრისა და კინოს რეჟისორის, მწერლისა და მოქანდაკის რეზო გაბრიაძის მიერ მეოცე საუკუნის 80-იან წლებში დაარსებული მარიონეტების თეატრი, თბილისის არამარტო კულტურულად საინტერესო და მიმზიდველ არამედ, მისი უნიკალური არქიტექტურის წყალობით, ქალაქის ერთ-ერთ ყველაზე გამორჩეულ - საკულტო ღირსშესანიშნაობას წარმოადგენს.
თეატრის შემოქმედებითი სიცოცხლე 1981 წელს, ალექსანდრე დიუმას „ქალი კამელიებით“ გაბრიაძისეული, სრულიად ახალი მხატვრული გადაწყვეტითა და მისივე რეჟისორობითვე დადგმული „ალფრედი და ვიოლეტა“ სპექტაკლით დაიწყო, რომლის მთავარი გმირი, ჯუზეპე ვერდის ოპერით შთაგონებული მგრძნობიარე და სიყვარულისთვის თავგანწირული ვიოლეტა - 20 წლის ახალგაზრდა გოგონაა. ამ და სხვა წარმოდგენების ნახვა დღესაც შესაძლებელია.
გაბრიაძის თეატრის რეპერტუარისა და კულტურული მნიშვნელობის მიღმა კი აღსანიშნავია მისი განსაცვიფერებელი არქიტექტურული მხარეც.
თბილისის ძველი ქალაქის შუაგულში მდებარე თეტრის შენობა, მრავალფეროვანი არქიტექტურული ელემენტებით გამოირჩევა, რასაც თან ახლავს საათის კოშკი, რომელიც 2010 წელს უშუალოდ რეზო გაბრიაძის პროექტითა და მისი მონაწილეობით აშენდა. მისი ფასადი მოპირკეთებულია ათასობით შორენკეცით, რომლებიც მხატვრის ხელითაა მოხატული.
გაბრიაძის მარიონეტების უნიკალური თეატრი საშემსრულებლო ხელოვნებაში შემოქმედების, მდიდარი ტრადიციის, ინოვაციისა და ამასთან, ქალაქის ერთ-ერთი სიმბოლოა.