Tbilisi City Guide

საქართველოს ეროვნული მუზეუმის შემადგენლობაში შემავალი, 2006 წელს დაფუძნებული საბჭოთა ოკუპაციის მუზეუმი - საბჭოთა მმართველობის ეპოქის კომპლექსურ ისტორიაზე მოგვითხრობს. მუზეუმში თავმოყრილი ექსპონატები ბოლშევიკური რუსეთის მიერ საქართველოს სამოცდაათწლიან ოკუპაცია-ანექსიას, ანტისაოკუპაციო წინააღმდეგობას, რეპრესიებსა და ეროვნულ-განმათავისუფლებელი მოძრაობის ისტორიას ასახავს.
დღეისათვის მუზეუმში დაცულია აღნიშნული პერიოდის ამსახველი იშვიათი და მნიშვნელოვანი დოკუმენტები, ფოტომასალა, 1920-იან-1940-იანი წლების "წითელი ტერორის" დროს დახვრეტილ და გადასახლებულ მამულიშვილთა სიები, ქართული ეკლესიის და სასულიერო მოღვაწეთა სასტიკი დევნის ამსახველი დოკუმენტები, პროპაგანდისტული მასალები, რეჟიმის მოწინააღმდეგე დისიტენთა მემორიალური ნივთები და მათ მოღვაწეობასთან დაკავშირებული დოკუმენტური მასალა.
ამჟამად ექსპოზიცია 3000-ზე მეტ ექსპონატს მოიცავს. საგამოფენო სივრცე აღჭურვილია 8 მონიტორით, რომლებიც პერიოდების მიხედვით გადმოსცემს ანტისაოკუპაციო მოძრაობასთან დაკავშირებულ დოკუმენტურ კადრებს. ამასთან, მულტიმედიური ჩვენებები, მათ შორის მოკლემეტრაჟიანი ფილმები, ინტერაქტიული ექსპონატები და სხვადასხვა სახის ინსტალაციები.
ცალკე აღნიშვნის ღირსია მუზეუმში შემუშავებული საგანმანათლებლო პროგრამა, რომელიც ეძღვნება საქართველოს ეროვნულ-განმათავისუფლებელი მოძრაობის ცალკეულ მნიშვნელოვან მოვლენებს და ქვეყნის სახელმწიფოებრივი დამოუკიდებლობისთვის მებრძოლ გმირებს.
მუზეუმში ვიზიტი დაგეხმარებათ გაიღრმავოთ ცოდნა საქართველოს უახლესი ისტორიის შესახებ.